నా ఓటూ హిల్లరీకే!: బరాక్ ఒబామా ప్రకటన
అమెరికా అధ్యక్ష ఎన్నికల బరిలోకి డెమొక్రటిక్ పార్టీ తరఫున దిగనున్న హిల్లరీ క్లింటన్ కు నిన్న మరింత మద్దతు లభించింది. అమెరికా అధ్యక్షుడు బరాక్ ఒబామా తన మద్దతు హిల్లరీకేనని ఘనంగా ప్రకటించారు. ఈ మేరకు ఆయన విడుదల చేసిన ఓ వీడియో సందేశంలో ఈ ప్రకటన చేశారు. పార్టీ తరఫున బరిలోకి దిగే విషయంలో హిల్లరీ క్లింటన్ తో బెర్నీ శాండర్స్ హోరాహోరీగా తలపడ్డారు. ఈ క్రమంలో జరిగిన ప్రైమరీ ఎన్నికల్లో శాండర్స్ పై పైచేయి సాధించిన హిల్లరీ ఇటీవలే డెమొక్రటిక్ అభ్యర్థిగా ఖరారయ్యారు. ఈ నేపథ్యంలో అమెరికా ప్రజలు హిల్లరీ అభ్యర్థిత్వానికి ఓటేశారని, తన ఓటు కూడా ప్రజల అభీష్టం మేరకు హిల్లరీకే వేస్తున్నట్లు ఒబామా ప్రకటించారు. శాండర్స్ సత్తా ఉన్న నేతే అయినప్పటికీ ఆయన కంటే హిర్లరీనే మెరుగ్గా రాణించగలరని కూడా ఒబామా పేర్కొన్నారు.